ch. 1
Them.1.1
Themistocles, Neocli filius, Atheniensis. huius
vitia ineuntis adulescentiae magnis sunt emendata virtutibus, adeo ut anteferatur huic nemo, pauci pares
putentur.
Them.1.2
sed ab initio est ordiendus. pater eius
Neocles generosus fuit. is uxorem Acarnanam civem
duxit, ex qua natus est Themistocles. qui cum minus
esset probatus parentibus, quod et liberius vivebat et
rem familiarem neglegebat, a patre exheredatus est.
quae contumelia non fregit eum, sed erexit.
Them.1.3
nam cum iudicasset sine summa industria non posse eam exstingui, totum se dedidit rei publicae, diligentius amicis
famaeque serviens. multum in iudiciis privatis versabatur, saepe in contionem populi prodibat; nulla res
maior sine eo gerebatur; celeriter quae opus erant
Them.1.4
reperiebat, facile eadem oratione explicabat, neque
minus in rebus gerendis promptus quam excogitandis
erat, quod et de instantibus, ut ait Thucydides, verissime iudicabat et de futuris callidissime coniciebat.
quo factum est ut brevi tempore illustraretur.